روس نے تصدیق کی ہے کہ بحیرہ اسود کی بندرگاہ پر یوکرین کے حملے میں اس کے ایک جنگی جہاز کو نقصان پہنچا ہے۔

برطانوی خبر رساں ادارے کی خبر کے مطابق روس کی وزارت دفاع کا کہنا ہے کہ بندرگاہ پر لنگر انداز ہونے والے بڑے جہاز نووچرکاسک کو گائیڈڈ میزائل لے جانے والے یوکرین کے طیارے نے نشانہ بنایا۔

یہ فضائی حملہ منگل کی علی الصبح روس کے زیر قبضہ کرائمیا کے علاقے فیودوسیا میں کیا گیا۔

قبل ازیں یوکرینی فضائیہ کے سربراہ نے کہا تھا کہ اس کے جنگی طیاروں نے جہاز کو تباہ کر دیا ہے۔

کریمیا کے روسی سربراہ سرگئی اکسیونوف کے مطابق اس حملے میں ایک شخص ہلاک ہوا ہے۔ اطلاعات کے مطابق کئی دیگر افراد زخمی بھی ہوئے ہیں۔

روسی سربراہ سرگئی اکسیونوف نے مزید کہا کہ چھ عمارتوں کو نقصان پہنچا ہے اور بہت کم لوگوں کو عارضی رہائش گاہوں میں لے جانا پڑا ہے۔

بتایا جاتا ہے کہ علاقے کو گھیرے میں لینے کے بعد بندرگاہ کی ٹرانسپورٹ آپریشن معمول کے مطابق چل رہا ہے جبکہ حملے کے نتیجے میں لگنے والی آگ پر قابو پا لیا گیا ہے۔

یوکرین کی فضائیہ کے کمانڈر لیفٹیننٹ جنرل مائیکولا اولیشک نے مبینہ طور پر بندرگاہ پر ایک بڑے دھماکے کی فوٹیج شیئر کی تھی۔

تصاویر کی آزادانہ طور پر تصدیق نہیں کی گئی ہے۔ تاہم، 24 دسمبر کی سیٹلائٹ تصاویر میں فیوڈوسیا کی بندرگاہ پر ایک جہاز کو دکھایا گیا ہے جس کی لمبائی نووچرکاسک کے برابر دکھائی دیتی ہے۔

دریں اثنا یوکرین کی فضائیہ کے ترجمان نے اس بات کی تردید کی ہے کہ روس نے اپنے دو ایس یو-24 بمبار طیاروں کو مقبوضہ یوکرین کے شہر میکولیف سے تقریبا 125 کلومیٹر (77 میل) کے فاصلے پر مار گرایا ہے۔

یوکرینی ترجمان نے حال ہی میں روسی وزیر دفاع سرگئی شوئیگو کے اس دعوے کی بھی تردید کی ہے کہ ان کی فوج نے مشرقی یوکرین کے اہم قصبے مارینکا پر قبضہ کر لیا ہے۔

یہ علاقہ یوکرین 2014 سے دفاعی رکاوٹ کے طور پر استعمال کر رہا ہے، جب روسی حمایت یافتہ جنگجوؤں نے ڈونیٹسک اور لوہانسک کے علاقوں کے بڑے حصے پر قبضہ کر لیا تھا۔