سائنسدانوں نے اب تک کا قدیم ترین بلیک ہول دریافت کر لیا جو اپنی میزبان کہکشاں کو ‘کھا’ رہا ہے۔
ایک معروف ویب سائٹ کے مطابق سائنس دانوں نے کائنات کا قدیم ترین بلیک ہول دریافت کر لیا ہے۔ یہ دریافت جیمز ویب اسپیس ٹیلی سکوپ (جے ڈبلیو ایس ٹی) کے ذریعے ممکن ہوئی، جو اب تک کی سب سے طاقتور خلائی دوربین اور ہبل کی جانشین ہے۔
سائنس دانوں کا کہنا ہے کہ یہ جان کر حیرانی ہوئی کہ اس طرح کا بڑا اور غیر معمولی بلیک ہول، جو ہمارے سورج کی کمیت سے چند ملین گنا زیادہ ہے ابتدائی کائنات میں موجود تھا۔
بین الاقوامی تحقیقی ٹیم کی قیادت کیمبرج یونیورسٹی کے ماہرین کر رہے تھے اور یہ تحقیق معروف ویب سائٹ پر شائع ہوئی ہے۔
یونیورسٹی کی جانب سے جاری بیان کے مطابق یہ بلیک ہول بگ بینگ کے 40 کروڑ سال بعد یعنی 13 ارب سال قبل کا ہے اور اب یہ اپنی کہکشاں کو کھا رہا ہے۔
اب تک کے مطالعات سے پتہ چلتا ہے کہ بلیک ہولز، جیسا کہ ہماری ملکی وے کہکشاں میں پایا جاتا ہے، کو اپنے موجودہ سائز تک بڑھنے میں اربوں سال لگے۔
محققین کا کہنا ہے کہ اس نئے دریافت ہونے والے بلیک ہول کے سائز سے پتہ چلتا ہے کہ وہ دوسرے طریقوں سے بھی بن سکتے ہیں۔
کیمبرج کی کیونڈش لیبارٹری اور کاولی انسٹی ٹیوٹ فار کاسمولوجی سے تعلق رکھنے والے پروفیسر رابرٹو مائیولینو کا کہنا ہے کہ ‘کائنات میں اتنے بڑے بلیک ہول کو دیکھنا ابھی قبل از وقت ہے، اس لیے ہمیں ان کی تشکیل کے دیگر طریقوں پر غور کرنا ہوگا۔
تحقیق کے سربراہ کا مزید کہنا تھا کہ ‘ابتدائی کہکشائیں انتہائی گیس سے بھرپور تھیں اس لیے وہ بلیک ہول کے لیے بوفے کی طرح ثابت ہوتی ہیں۔’
معیاری ماڈلز کے مطابق مردہ ستاروں کی باقیات سے بڑے اور غیر معمولی بلیک ہول بنتے ہیں، جو گر جاتے ہیں اور سورج کی کمیت سے تقریبا سو گنا زیادہ بلیک ہول تشکیل دے سکتے ہیں۔
لیکن جے ڈبلیو ایس ٹی کی جانب سے پکڑی گئی روشنی کے مطابق یہ بلیک ہول اس وقت کا ہے جب کائنات ایک ارب سال پرانی نہیں تھی۔
تحقیق میں کہا گیا ہے کہ یہ ابھی جوان ہے اور اپنی میزبان کہکشاں سے مادے کو کھا کر اپنی نشوونما کو فروغ دے رہا ہے۔ اس کی کہکشاں جی این زیڈ 11 بھی جوان ہے اور اس کے مرکز میں موجود طاقتور بلیک ہول سے چمکتی ہے۔
جی این زیڈ 11 ملکی وے سے تقریبا سو گنا چھوٹا ہے ، لیکن بلیک ہول ممکنہ طور پر اس کی نشوونما کو نقصان پہنچا رہا ہے۔
