بھارت میں سمندری طوفان ’ڈانا‘ کے خطرے کے پیش نظر فوج، بحریہ، کوسٹ گارڈ اور امدادی ٹیموں کو ہائی الرٹ کر دیا گیا ہے۔
بھارتی میڈیا کے مطابق کولکاتا کے نیتاجی سبھاش چندر بوس بین الاقوامی ہوائی اڈے پر فلائٹ آپریشن معطل کر دیا گیا ہے۔
موسمیاتی ماہرین کا کہنا ہے کہ سمندری طوفان دانا کے شمال مغرب کی طرف بڑھنے اور 24 اکتوبر کی صبح تک شمال مغربی خلیج بنگال میں ایک شدید سمندری طوفان میں تبدیل ہونے کا امکان ہے۔
توقع ہے کہ یہ سمندری طوفان 24 اکتوبر کی رات اور 25 اکتوبر کی صبح کے درمیان اُڑیسہ کے بھیترکنیکا اور دھامارا کے قریب پوری اور ساگر جزیرے کے درمیان شمالی اُڑیسہ اور مغربی بنگال کے ساحلوں کو عبور کرے گا۔
طوفان میں 100-110 کلومیٹر فی گھنٹہ کی رفتار سے چلنے والی شدید ہواؤں نے سمندری طوفان کی شدت میں مزید اضافہ کر دیا ہے۔
مغربی بنگال حکومت نے سمندری طوفان دانا کے بارے میں بھارتی محکمہ موسمیات (آئی ایم ڈی) کے نوٹس کے بعد ریاست کے کئی حصوں میں اسکول اور تعلیمی ادارے بھی بند کر دیئے ہیں۔
