سابق وزیر اعلیٰ پنجاب چودھری پرویز الٰہی نے کہا ہے کہ ہم نے پی ٹی آئی کے ساتھ شانہ بشانہ چلنا ہے۔

تفصیلات کے مطابق سماجی رابطے کی ویب سائٹ ٹوئٹڑ پر سابق وزیر اعلیٰ پنجاب چودھری پرویز الٰہی نے اپنے ایک بیان میں کہا کہ نگران وزیراعلیٰ پنجاب محسن نقوی جوکچھ کر رہے ہیں وہ انکا کام نہیں ہے وہ صرف فری اینڈ فیئرالیکشن کروائیں۔

انہوں نے کہا کہ آئین پاکستان کے تحت گورنر پنجاب الیکشن شیڈول کا اعلان کرے۔

ان کا کہنا تھا کہ محسن نقوی کی دوڈھائی ماہ کی نوکری ہے اس کے بعد گھر ہی واپس آنا ہے اور جب الیکشن شیڈول آگیا تو پھر کسی نے اس کو منہ بھی نہیں لگانا۔

پرویز الٰہی نے کہا کہ ہم نے پی ٹی آئی کے ساتھ شانہ بشانہ چلنا ہے۔

انہوں نے کہا کہ اللہ کا عمران خان پر خاص کرم ہے لوگ کہتے ہیں کہ یہ کام غلط ہے لیکن وہی کام عمران خان کیلئے اچھا ہو جاتا ہے۔

ان کا کہنا تھا کہ آج تقریر کے دوران پی ٹی آئی رہنما فواد چودھری کے متعلق جو گفتگو ہوئی اس پر معذرت خواہ ہوں۔

سابق وزیر اعلیٰ پنجاب چودھری پرویز الٰہی نے مزید کہا کہ فواد چودھری کی پوری فیملی سے ہمارے دیرینہ تعلقات ہیں، میرے بیان سے ان کی فیملی کو دکھ پہنچا جس پر میں ان سے معذرت خواہ ہوں۔

دوسری جانب سماجی رابطے کی ویب سائٹ ٹوئٹڑ پر سابق وزیر اعلیٰ پنجاب چودھری پرویز الٰہی نے اپنے ایک اور بیان میں کہا کہ اللہ کے بعد عمران خان کا دل کی گہرائیوں سے شکر ادا کرتے ہیں، جنہوں نے پنجاب کی وزارت اعلیٰ کیلئے منتخب کیا۔

انہوں نے کہا کہ اگر اسمبلیاں اپنی مدت پوری کرتی تو آج مسلم لیگ ن کے کپڑے بھی یہاں نظر نہ آتے۔

ان کا کہنا تھا کہ چودھری ظہور الٰہی کے زمانے سے لیکر آج تک ہم نے اس طرح کے سیاسی حالات بہت دیکھے ہیں لیکن ہم گھبرانے والے نہیں ہیں۔

 ان کا یہ بھی کہنا تھا کہ ن لیگ والے جب ہم سے ملتے ہیں تو کہتے ہیں کہ شکر ہے آپ کی حکومت ختم ہوئی ورنہ آپ تو ہم کو لے دے بیٹھے تھے۔

پرویز الٰہی نے کہا کہ راسخ الٰہی نے خاتم النبیینﷺ یونیورسٹی بنانے میں اہم کردار ادا کیا۔

انہوں نے کہا کہ عمران خان نےھ بھی تحفظ ختم نبوتﷺ کے حوالے سے بہت کام کیا ہے۔

سابق وزیر اعلیٰ پنجاب چودھری پرویز الٰہی نے مزید کہا کہ پہلی سے پانچویں کلاس تک ناظرہ اور چھٹی سے دسویں جماعت تک قرآن پاک کی تعلیم دی جا رہی ہے۔