پیمرا کی جانب سے عمران خان کی اسلام آباد کی عدالت میں پیشی کے موقع پر تمام ٹی وی چینلز پر براہ راست کوریج پر پابندی عائد کردی گئی ہے۔

پاکستان الیکٹرانک میڈیا ریگولیٹری اتھارٹی نے پیر کو اسلام آباد کے آس پاس کے علاقوں میں جلسوں، جلوسوں اور عوامی اجتماعات کی براہ راست نشریات پر پابندی عائد کر دی ہے۔

پیمرا کے حکم کے مطابق کوریج پر پابندی صرف آج کے لیے نافذ العمل ہے۔

میڈیا ریگولیٹری اتھارٹی نے اپنے بیان میں کہا کہ پابندی قانون نافذ کرنے والے اداروں کی جانب سے لکھے گئے خط میں بتائی گئی تفصیلات کو مدنظر رکھتے ہوئے لگائی گئی ہے۔

خیال  رہے کہ پی ٹی آئی کے چیئرمین عمران خان وفاقی دارالحکومت کے مختلف تھانوں میں اپنے خلاف درج 5 مقدمات میں حفاظتی ضمانت کی درخواستیں دائر کرنے کے لیے آج لاہور سے اسلام آباد ہائی کورٹ پہنچ رہے ہیں۔