نگران وفاقی وزیر اطلاعات مرتضیٰ سولنگی نے کہا ہے کہ جیسے ہی نگران حکومت کے لئے ممکن ہوا پیٹرول 40 روپے اور ڈیزل 15 روپے فی لٹر سستا کر دیا گیا۔
مرتضیٰ سولنگی نے سماجی رابطے کی ویب سائٹ ایکس (سابقہ ٹوئٹر) پر جاری بیان میں کہا کہ جب جب پیٹرول کی قیمتوں میں اضافہ ہوا، ٹرانسپورٹ کے شعبے نے مال برداری اور کرایوں میں اضافہ کیا، اب ان پر لازم ہے کہ ان میں کمی کی جائے اور عوام کو ریلیف دیا جائے۔
جیسے ہی نگران حکومت کیلیے ممکن ہوا تو پیٹرول چالیس روپے اور ڈیزل پندرہ روپے سستہ کر دیا گیا۔ جب جب ان قیمتوں میں اضافہ ہوا، ٹرانسپورٹ کے شعبے نے مال برداری اور کرایوں میں اضافہ کیا۔ اب ان پر لازم ہے کہ ان میں کمی کی جائے اور عوام کو رلیف دیا جائے۔ صوبائی اور ضلعی انتظامیہ کو اس…
— Murtaza Solangi (@murtazasolangi) October 15, 2023
نگران وزیر اطلاعات نے مزید کہا کہ صوبائی اور ضلعی انتظامیہ کو اس سلسلے میں اپنا کردار ادا کرنا چاہیے۔
گزشتہ روز نگران حکومت نے عوام کو ریلیف دیتے ہوئے پیٹرولیم مصنوعات کی قیمتوں میں بڑی کمی کا اعلان کیا تھا۔
وزارت خزانہ کی جانب سے جاری کردہ نوٹیفکیشن کے مطابق پیٹرول کی فی لیٹر قیمت میں 40 روپے کمی کی گئی جس کے بعد پیٹرول کی نئی قیمت 283 روپے 38 پیسے فی لیٹر ہو گئی۔
نوٹیفکیشن کے مطابق ہائی اسپیڈ ڈیزل کی قیمت میں 15 روپے فی لیٹر کمی کی گئی جس کے بعد ہائی اسپیڈ ڈیزل کی نئی قیمت 303 روپے 18 پیسے فی لیٹر ہوگئی جبکہ لائٹ ڈیزل آئل کی قیمت میں 19 روپے فی لیٹر کمی کی گئی جس کے بعد آئل کی نئی قیمت 192 روپے 86 پیسے فی لیٹر ہوگئی۔
نوٹیفکیشن میں کہا گیا تھا کہ مٹی کے تیل کی قیمت میں 22 روپے 43 پیسے کی کمی کی گئی جس کے بعد مٹی کے تیل کی نئی قیمت 214 روپے 85 پیسے فی لیٹرہوگئی۔
وزارت خزانہ کے مطابق پیٹرولیم مصنوعات کی قیمتوں میں کمی کی بنیادی وجہ امریکی ڈالر کے مقابلے میں پاکستانی روپے کی قدر میں اضافہ اور عالمی منڈی میں خام تیل کی قیمتوں میں کمی ہے۔
واضح رہے کہ 30 ستمبر کو نگران حکومت کی جانب سے عوام کو ریلیف دیتے ہوئے پیٹرول کی قیمت میں 8 روپے کی کمی گئی تھی جبکہ ہائی اسپیڈ ڈیزل کی قیمت میں بھی 11 روپے کی کمی کا فیصلہ کیا گیا تھا۔
اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں
ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں
پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں اور بیل آئیکن پر کلک کریں
