ملک بھر میں عام انتخابات کے لئے پولنگ کے عمل کا عمل شروع ہو گیا ہے، لوگ اپنے حلقوں میں ووٹ کاسٹ کرنے پہنچ گئے ہیں۔

عام انتخابات کے لئے پاکستان کی اہم سیاسی شخصیات نے اپنا ووٹ کاسٹ کر دیا ہے۔

 آصفہ بھٹو زرداری

پاکستان پیپلز پارٹی (پی پی پی) کی رہنما آصفہ بھٹو زرداری نے نوابشاہ میں ووٹ کاسٹ کر دیا ہے۔

مولانا فضل الرحمان

جمعیت علمائے اسلام (ف) کے مرکزی سربراہ مولانا فضل الرحمان نے اپنا ووٹ صوبہ خیبر پختونخوا کے ضلع ڈیرہ اسماعیل خان میں کاسٹ کیا۔

فاروق ستار

  متحدہ قومی موومنٹ (ایم کیو ایم) پاکستان کے سینئر ڈپٹی کنوینر ڈاکٹر فاروق ستار نے کراچی میں ووٹ کاسٹ کر دیا۔

مرتضیٰ سولنگی

نگران وزیرِ اطلاعات مرتضیٰ سولنگی نے این اے 46 کے پولنگ اسٹیشن اسلام آباد ماڈل اسکول ڈورہ میں اپنا ووٹ کاسٹ کیا۔

اس موقع پر مرتضیٰ سولنگی نے کہا کہ ووٹ ایک قومی فریضہ ہے جو ہر ذمہ دار شہری نے ادا کرنا ہے، آزادانہ اور شفاف انتخابات ملک میں جمہوریت کو مضبوط بناتے ہیں۔

شہباز شریف

پاکستان مسلم لیگ (ن) کے صدر و سابق وزیراعظم شہباز شریف نے حلقہ این اے 128 میں اپنا ووٹ کاسٹ کیا۔

اس موقع پر شہباز شریف نے کہا کہ سیکیورٹی کے حوالے سے تمام انتظامات بہترین ہیں، ایک دن ضرور آئے گا پاکستان سے مہنگائی بے روزگاری کا خاتمہ ضرور ہوگا۔

خواجہ آصف

پاکستان مسلم لیگ (ن) کے رہنما خواجہ محمد آصف نے بھی سیالکوٹ میں اپنا ووٹ کاسٹ کر دیا۔

یہ بھی پڑھیں: عام انتخابات 2024: ملک بھر میں پولنگ کا عمل جاری

واضح رہے کہ پاکستان بھر میں عام انتخابات 2024 کے لیے پولنگ کے عمل کا آغاز ہوگیا ہے، تاہم پولنگ کا عمل بغیر کسی وقفے کے صبح 8 بجے سے شام 5 بجے تک جاری رہے گا۔

قومی اور چاروں صوبائی اسمبلیوں کے 855 حلقوں کیلئے 12 کروڑ 79 لاکھ سے زیادہ رجسٹرڈ ووٹرز اپنا حق رائے دہی استعمال کریں گے جبکہ ان انتخابات میں ملک کی انتخابی تاریخ میں سب سے زیادہ امیدوار حصہ لے رہے ہیں جن کی تعداد 17 ہزار  سے زائد ہے جن میں 11 ہزار سے زائد آزاد امیدوار ہیں۔

ملک بھر میں 90 ہزار 675 میں سے 46 ہزار 65 پولنگ اسٹیشنز کو حساس و انتہائی حساس قرار دیا گیا ہے جبکہ شفاف پولنگ کے لیے مختلف شہروں میں مانیٹرنگ سیلز قائم کیے گئے ہیں۔