کراچی: سندھ حکومت نے آئندہ مالی سال کے لیے 3,300 ارب روپے سے زائد کا بجٹ پیش کرنے کی تیاری مکمل کر لی ہے، جو رواں مالی سال کے 3,056 ارب روپے کے بجٹ سے تقریباً 300 ارب روپے زائد ہے۔
ذرائع کے مطابق نئے مالی سال کے ترقیاتی بجٹ میں نمایاں اضافہ کیا جا رہا ہے اور اس کے لیے 1,100 ارب روپے سے زائد مختص کرنے کی تجویز دی گئی ہے۔
اس کے علاوہ 400 ارب روپے سے زائد کے غیر ملکی فنڈز پر مشتمل منصوبوں کو بھی بجٹ میں شامل کیے جانے کا امکان ہے۔
اہم شعبہ جات کیلئے مختص بجٹ کی تفصیلات:
تعلیم: 550 ارب روپے
صحت: 340 ارب روپے
بلدیات: 350 ارب روپے
مزید پڑھیں: سندھ حکومت کا آئندہ بجٹ میں بڑے اقدامات کا اعلان
داخلہ (داخلہ و پولیس): 200 ارب روپے
ٹرانسپورٹ: 75 ارب روپے
غربت مٹاؤ پروگرامز: 40 ارب روپے
مزید برآں، صوبے کی ٹیکس وصولیوں کا ہدف بھی بڑھا کر 800 ارب روپے سے زائد مقرر کرنے کی تجویز دی گئی ہے، جس کا مقصد صوبائی آمدنی کو مزید مستحکم بنانا ہے۔
سندھ حکومت آئندہ بجٹ میں ترقیاتی کاموں، بنیادی سہولیات کی بہتری اور معاشی استحکام کو ترجیح دے رہی ہے جبکہ عوامی خدمات سے متعلق شعبوں کو بجٹ میں نمایاں حصہ دینے کا فیصلہ کیا گیا ہے۔
