اسلام آباد: وزیراعظم شہباز شریف نے پاکستان تحریک انصاف (پی ٹی آئی) کو مذاکرات کی پیشکش کرتے ہوئے کہا ہے کہ حکومت بات چیت کے لیے تیار ہے تاہم اس کے لیے احتجاج، مارچ اور دھرنوں کا سلسلہ ختم کرنا ہوگا۔
اسلام آباد میں تقریب سے خطاب کرتے ہوئے وزیراعظم شہباز شریف نے کہا کہ حکومت نے گزشتہ ڈھائی سال کے دوران مسلسل محنت اور ٹیم ورک کے ذریعے ملکی معیشت کو استحکام کی جانب گامزن کیا ہے۔
وزیراعظم نے کہا کہ ملک نے بڑی محنت سے جو معاشی استحکام حاصل کیا ہے اسے برقرار رکھنا وقت کی اہم ضرورت ہے کیونکہ مضبوط معیشت ہی پاکستان کی ترقی اور عالمی سطح پر بہتر مقام کی بنیاد بن سکتی ہے۔
شہباز شریف کا کہنا تھا کہ حکومت کی جانب سے مذاکرات کے ذریعے مسائل حل کرنے کی متعدد کوششیں کی گئیں تاہم بدقسمتی سے یہ کوششیں مطلوبہ نتیجے تک نہیں پہنچ سکیں۔
انہوں نے کہا کہ ایک طرف پاکستان معاشی اور ترقیاتی سمت میں آگے بڑھ رہا ہے جب کہ دوسری جانب احتجاج اور دھرنوں کی سیاست سے کاروباری سرگرمیوں اور ملکی معیشت پر منفی اثرات مرتب ہونے کا خدشہ ہے۔
وزیراعظم نے خبردار کیا کہ مسلسل احتجاج کے نتیجے میں برآمدات، درآمدات اور مینوفیکچرنگ سمیت مختلف معاشی شعبے متاثر ہوسکتے ہیں جس کا نقصان بالآخر ملک اور عوام کو اٹھانا پڑے گا۔
انہوں نے اپوزیشن سے اپیل کی کہ سیاسی اختلافات کو مذاکرات کے ذریعے حل کیا جائے اور ایسے اقدامات سے گریز کیا جائے جن سے ملکی ترقی اور عالمی سطح پر پاکستان کی ساکھ متاثر ہو۔
شہباز شریف نے مزید کہا کہ حکومت کے دروازے مذاکرات کے لیے کھلے ہیں تاہم سیاسی سرگرمیوں کے نام پر دھرنوں اور احتجاج کے ذریعے ملک کی معاشی رفتار کو متاثر کرنا کسی کے مفاد میں نہیں۔
وزیراعظم نے سوال اٹھایا کہ جب ملک بڑی مشکل سے معاشی استحکام کی جانب بڑھ رہا ہو تو ترقی کے عمل میں رکاوٹ ڈالنا کس طرح قومی مفاد میں ہوسکتا ہے۔
انہوں نے پی ٹی آئی سمیت تمام سیاسی قوتوں پر زور دیا کہ وہ حالات کا ادراک کریں، ملکی مفاد کو ترجیح دیں اور سیاسی مسائل کے حل کے لیے بات چیت کا راستہ اختیار کریں۔
