ٹیکنالوجی کی دنیا کے معروف ارب پتی ایلون مسک نے انسٹاگرام سے متعلق ایک مختصر مگر طنزیہ تبصرہ کیا ہے، جس کے بعد سوشل میڈیا صارفین کے درمیان نئی بحث شروع ہوگئی۔
ایلون مسک نے ایک پوسٹ کے جواب میں کہا، ”انسٹاگرام لڑکیوں کے لیے ہے۔“ ان کا یہ تبصرہ سوشل میڈیا پلیٹ فارم ایکس پر تیزی سے وائرل ہوگیا، جس پر ہزاروں صارفین نے اپنی رائے کا اظہار کیا۔
یہ بحث اس وقت شروع ہوئی جب گیگر کیپیٹل نے ایکس پر اعلان کیا کہ اس نے اپنا انسٹاگرام اکاؤنٹ ختم کردیا ہے۔ پوسٹ میں انسٹاگرام کو بنیادی طور پر خواتین کے لیے استعمال ہونے والا پلیٹ فارم قرار دیا گیا تھا۔
ایلون مسک نے اسی پوسٹ کے جواب میں مختصر جملہ لکھا: ”انسٹاگرام لڑکیوں کے لیے ہے۔“
یہ پہلی مرتبہ نہیں کہ ایلون مسک نے انسٹاگرام کو اس انداز میں تنقید کا نشانہ بنایا ہے رواں سال مئی میں بھی سوشل میڈیا کے استعمال سے متعلق ایک وائرل بحث کے دوران انہوں نے انسٹاگرام کے بارے میں اسی نوعیت کا تبصرہ کیا تھا۔
یہ بھی پڑھیں: ایلون مسک کی دولت نے تاریخ بدل دی، 839 ارب ڈالر کے ساتھ دنیا کے امیر ترین انسان
اس موقع پر مسک نے ان مرد صارفین پر بھی طنز کیا تھا جو انہیں اپنے انسٹاگرام پروفائلز کے لنکس بھیجتے ہیں۔
سوشل میڈیا صارفین کی مختلف آرا
ایلون مسک کے تازہ بیان پر صارفین کی آرا مختلف نظر آئیں۔ بعض صارفین نے ان کے مؤقف سے اتفاق کرتے ہوئے ایکس کو مردوں یا ”لڑکوں“ کے لیے زیادہ موزوں پلیٹ فارم قرار دیا جبکہ دیگر صارفین نے انسٹاگرام کو کسی ایک جنس تک محدود کرنے کی مخالفت کی۔
ایک صارف نے مسک کے تبصرے سے اختلاف کرتے ہوئے کہا کہ انسٹاگرام تمام اصناف کے لوگوں کے لیے ایک پلیٹ فارم ہے، جہاں جسمانی مثبت سوچ، شمولیت اور مختلف اقسام کی نمائندگی بھی دیکھنے کو ملتی ہے۔
ایک اور صارف نے طنزیہ انداز میں مسک کو مخاطب کرتے ہوئے لکھا، ”بھائی کو اس وقت احساس ہوا جب اس نے خود انسٹا اکاؤنٹ بنا لیا۔“
مسک اور میٹا کی پرانی رقابت
ایلون مسک اور میٹا کے درمیان سوشل میڈیا کے شعبے میں یہ مقابلہ نیا نہیں۔ جولائی 2023 میں میٹا نے ٹیکسٹ پر مبنی پلیٹ فارم تھریڈز (Threads) متعارف کرایا، جسے ایکس کے حریف کے طور پر دیکھا گیا۔
تھریڈز کو انسٹاگرام کے ساتھ مربوط کیا گیا جس کے باعث صارفین اپنے انسٹاگرام اکاؤنٹس کے ذریعے تھریڈز میں شامل ہوسکتے تھے۔ اس موقع پر ایلون مسک اور میٹا کے سربراہ مارک زکربرگ کے درمیان سوشل میڈیا پر طنزیہ جملوں کا تبادلہ بھی ہوا۔
بعد ازاں دونوں کمپنیوں کے درمیان مقابلہ سوشل میڈیا سے آگے بڑھ کر مصنوعی ذہانت (اے آئی) کے شعبے تک بھی پہنچ گیا، جہاں مسک کی کمپنی ایکس اے آئی اور میٹا اپنی اپنی اے آئی ٹیکنالوجیز کو مزید ترقی دے رہی ہیں۔
ایلون مسک کا انسٹاگرام سے متعلق تازہ تبصرہ اسی طویل عرصے سے جاری سوشل میڈیا اور ٹیکنالوجی کے مقابلے کے تناظر میں سامنے آیا ہے، جس نے ایک بار پھر سوشل میڈیا صارفین کو بحث کا موقع فراہم کردیا ہے۔
