لبنان کے عسکری گروپ حزب اللہ کے سربراہ نعیم قاسم نے ایران کے ساتھ مکمل یکجہتی اور حمایت کا اعلان کردیا ہے۔
سربراہ حزب اللہ نے اپنے جاری کردہ بیان میں کہا کہ سپریم لیڈر آیت اللہ خامنہ ای کو قتل کی دھمکیاں پورے خطے پر حملے کے مترادف ہیں، حزب اللہ ایران کے جائز حقوق، خودمختاری اور آزادی کے ساتھ بھرپور حمایت میں کھڑی ہے۔
انہوں نے واضح کیا کہ حزب اللہ اس معاملے میں غیرجانبدار نہیں بلکہ ایران کی مکمل حمایت کرتی ہے اور وقت آنے پر مناسب ردعمل بھی دے گی۔
نعیم قاسم نے امریکہ اور اسرائیل کے رویے کو خطے کے امن اور استحکام کے لیے خطرہ قرار دیتے ہوئے کہا کہ ان کی اشتعال انگیز پالیسیاں مشرق وسطیٰ کو مسلسل عدم استحکام کی طرف دھکیل رہی ہیں۔
سربراہ حزب اللہ نے مزید کہا کہ ایران کے ساتھ اسٹریٹیجک تعلقات پر حزب اللہ کو فخر ہے اور کسی بھی جارحیت کی صورت میں ہم اپنے اتحادیوں کے ساتھ کھڑے ہوں گے۔
