پاکستان کی لیجنڈری اداکارہ بشریٰ انصاری نے حال ہی میں ایک ویڈیو کے ذریعے ماضی کے مشہور گانوں پر تنقید کرتے ہوئے خواتین کے لیے ایک بیداری کا پیغام دیا، جو سوشل میڈیا پر خوب وائرل ہو رہا ہے۔
انسٹاگرام پر پوسٹ کی گئی ویڈیو میں بشریٰ انصاری نے ماضی کے کچھ معروف رومانوی گانے جیسے “تڑپا لو”، “آزما لو”، “میں تیری داسی” اور “تو میری عبادت” کا حوالہ دیتے ہوئے کہا کہ یہ سب نغمے عورت کو یہ سکھاتے رہے کہ وہ مرد کو خوش رکھنے کے لیے ہر تکلیف برداشت کرے۔
View this post on Instagram
انہوں نے مزید کہا کہ ان گانوں نے برسوں تک خواتین کو یہی سبق دیا کہ ان کی ذات کی اہمیت صرف مرد کی خوشی سے وابستہ ہے۔
گانے “سجنا ہے مجھے سجنا کے لیے” پر تبصرہ کرتے ہوئے بشریٰ انصاری نے کہا کہ لڑکیوں کو اپنے لیے سنورنا چاہیے، دوسروں کی خوشی پر اپنی ذات کو قربان نہیں کرنا چاہیے۔
مزید پڑھیں: اداکارہ بشریٰ انصاری ڈرامہ پروڈیوسرز پر برس پڑیں
ان کا کہنا تھا کہ نہیں، اب مزید نہیں، یہ گانے ہماری نئی نسل کی سوچ کو بگاڑ چکے ہیں، اب وقت ہے کہ ہم اپنی بیٹیوں کو سکھائیں کہ وہ اپنے لیے جئیں۔
سوشل میڈیا پر ان کی اس ویڈیو کو بے حد پذیرائی ملی، کئی صارفین نے انہیں سراہتے ہوئے تبصرہ کیا کہ جی بالکل درست کہا، آپ نے دل کی بات کہی۔
