کہتے ہیں کہ ضرورت ایجاد کی ماں ہے اور یہ کہنا بے جانہ ہوگا کہ ہمارے اردگرد جتنی بھی چیزیں ہیں وہ سب اسی نظریے کے تحت وجود میں آئی ہیں یہ بات آپ نے نوٹ کی ہوگی کہ ہر گزرتے وقت کے چیزیں سکڑتی جارہی ہیں تاکہ کم جگہ کا بہتر استعمال کیا جاسکے  اسی بات کو مدنظر رکھتے ہوئے جرمنی کی ایک اسٹارٹ اپ کمپنی نے ایسا کارگو ٹریلر تیار کیا ہے جو چند سیکنڈز میں ایکارڈیئن کی طرح فولڈ ہو کر سمٹ جاتا ہے۔

کارگو ٹریلر فرنیچر، سامان اور دیگر بھاری اشیا منتقل کرنے کے لیے انتہائی کارآمد ہوتے ہیں، لیکن استعمال نہ ہونے کی صورت میں انہیں محفوظ رکھنے کے لیے خاصی جگہ درکار ہوتی ہے۔ جرمن اسٹارٹ اپ فیلٹوس نے اسی مسئلے کا ایک منفرد حل پیش کیا ہے ایک ایسا ٹریلر جو استعمال کے بعد ایکارڈیئن کی طرح تہہ ہو جاتا ہے۔

کمپنی نے 2015 سے اس فولڈنگ ٹریلر پر کام کا آغاز کیا، اس کے ڈیزائن میں جستی اسٹیل کا فولڈ ہونے والا فریم اور تہہ ہونے والا کارگو بیڈ شامل ہے۔ کارگو بیڈ 18 ملی میٹر موٹی پلائی ووڈ پلیٹوں سے بنایا گیا ہے، جنہیں ایلومینیم کے قبضوں کو سپورٹ بریسز کے ذریعے جوڑا گیا ہے۔

یہ بھی پڑھیں: جرمن خاتون نے بند آنکھوں سے باربی ڈول پہچان کر عالمی اعزاز اپنے نام کرلیا

مکمل طور پر فولڈ ہونے کی حالت میں فیلٹوس کی لمبائی صرف 85 سینٹی میٹر، چوڑائی 185 سینٹی میٹر اور اونچائی 110 سینٹی میٹر رہ جاتی ہے۔ کمپنی کے مطابق اسے تقریباً 60 سیکنڈز میں مکمل طور پر کھول کر استعمال کے قابل بنایا جا سکتا ہے۔

کھلنے کے بعد ٹریلر کی لمبائی 371 سینٹی میٹر، چوڑائی 173 سینٹی میٹر اور اونچائی 85 سینٹی میٹر ہو جاتی ہے۔ اس طرح اس میں سامان رکھنے کے لیے اچھی خاصی جگہ دستیاب ہوتی ہے۔

فیلٹوس زیادہ سے زیادہ 550 کلوگرام وزن اٹھا سکتا ہے۔ خریدار اس میں ایک ہلکے وزن والے آپشن کا انتخاب بھی کر سکتے ہیں، جس سے ٹریلر کی وزن اٹھانے کی صلاحیت کم ہو جاتی ہے، تاہم اس کے نتیجے میں اسے زیادہ رفتار سے، زیادہ سے زیادہ 100 کلومیٹر فی گھنٹہ تک، کھینچا جا سکتا ہے۔

اس فولڈنگ ٹریلر کی ابتدائی قیمت 2,799 یورو ہے، جو تقریباً 3,200 امریکی ڈالر بنتی ہے۔ اضافی سہولیات میں سائیڈ وال ایکسٹینشنز، کارگو نیٹ، ترپال اور سپورٹ فٹ شامل ہیں۔

فی الحال فیلٹوس صرف یورپ میں دستیاب ہے۔