آرٹیکل 370 سے متعلق بھارتی سپریم کورٹ کے فیصلے پر محبوبہ مفتی کے بیان پر بھارتی حکومت سیخ پا ہوگئی۔
خبر رساں ادارے کے مطابق پیپلز ڈیموکریٹک پارٹی کی صدر محبوبہ مفتی کے دفعہ 370 سے متعلق بھارتی سپریم کورٹ کے جانبدارانہ فیصلے پر تبصروں اور بیانات پر مودی حکمت سیخ پا ہوگئی ہے۔
رپورٹ کے مطابق مودی حکومت نے محبوبہ مفتی کو انتباہ جاری کیا ہے جب کہ بی جے پی کے جنرل سیکرٹری ترن چغ نے ایک بیان میں محبوبہ مفتی پر عوامی جذبات بھڑکانے کا الزام لگایا۔
انہوں نے یہ بھی الزام عائد کیا کہ محبوبہ مفتی پاکستان کے اشاروں پر کام کررہی ہیں۔
یاد رہے کہ چند روز قبل ایک بیان میں محبوبہ مفتی نے کہا تھا کہ آرٹیکل 370 کے حوالے سے بھارتی سپریم کورٹ کا فیصلہ خدا کا فیصلہ نہیں۔
انہوں نے کہا تھا کہ ہماری پارٹی جموں و کشمیر کی خصوصی حیثیت کی بحالی کے لیے اپنی جدوجہد جاری رکھے گی۔
