دنیا کے امیر ترین افراد ذکر سنتے ہی ذہن میں عام طور پر ایلون مسک، جیف بیزوس اور بل گیٹس جیسے نام آتے ہیں، تاہم بادشاہوں کی فہرست میں تھائی لینڈ کے بادشاہ مہا وجیرالونگ کورن، یا کنگ رام، سب سے منفرد اور نمایاں ہیں۔
رپورٹس کے مطابق، بادشاہ رام کی دولت تقریباً 50 ارب ڈالر ہے، جو پاکستانی روپوں میں 4.5 لاکھ کروڑ سے زائد بنتی ہے۔ اگرچہ یہ رقم دنیا کے سب سے امیر تاجروں کے برابر نہیں، لیکن ان کے شاہانہ طرزِ زندگی اور وسیع دولت انہیں دنیا کے امیر ترین بادشاہوں میں شامل کرتی ہے۔
بادشاہ رام کی دولت کا بیشتر حصہ کرایے کی آمدنی سے حاصل ہوتا ہے۔ 2018 میں کراؤن پراپرٹی بیورو کا کنٹرول سنبھالنے کے بعد، بادشاہ رام نے اپنے تمام اثاثوں کے براہِ راست مالک بننے کی پوزیشن حاصل کی، جس سے ان کی آمدنی میں زبردست اضافہ ہوا۔
یہ بھی پڑھیں: مس ورلڈ 2025 کا تاج تھائی لینڈ کی حسینہ کے نام
بادشاہ رام کے پاس تھائی لینڈ بھر میں قیمتی جائیدادوں کا ایک وسیع مجموعہ ہے، جس میں تجارتی عمارتیں، ہوٹل، محلات اور ریزورٹس شامل ہیں۔
ان کے پاس تقریباً 6,560 ایکڑ زمین ہے، جس پر 40,000 سے زائد جائیدادیں تعمیر کی گئی ہیں۔ صرف بنکاک میں 17,000 سے زائد پراپرٹیز کرایے کی مد میں سالانہ اربوں روپے کی آمدنی فراہم کرتی ہیں۔
اس کے علاوہ، ان کی دولت کا ایک حصہ بینکنگ اور صنعتی شعبے سے بھی آتا ہے۔ وہ سیام کمرشل بینک کے تقریباً 23 فیصد اور سیام سیمنٹ گروپ کے تقریباً 33 فیصد حصص کے مالک ہیں، جو ملکی معیشت میں اہم کردار ادا کرتے ہیں۔
بادشاہ رام کے شاہانہ طرزِ زندگی کا اندازہ اس بات سے لگایا جا سکتا ہے کہ اگر وہ ہر رات ایک مختلف پراپرٹی میں قیام کریں، تو انہیں اپنی تمام جائیدادوں کو دیکھنے میں 47 سال لگ جائیں گے۔ ان کے پاس 38 نجی طیارے، متعدد ہیلی کاپٹر، 300 سے زائد لگژری گاڑیاں، 52 سونے کی کشتیوں اور قیمتی جواہرات کا ایک شاندار ذخیرہ بھی ہے، جو انہیں دنیا کے سب سے امیر اور پرتعیش بادشاہوں میں شامل کرتا ہے۔
