انڈے صحت بخش اجزاء سے بھرپور ایک مکمل غذا ہیں یہی وجہ ہے کہ ہر عمر کے افراد انہیں ناشتے میں شامل رکھتے ہیں۔ تاہم ان کے خراب یا آلودہ ہونے کی صورت میں صحت کو نقصان پہنچ سکتا ہے۔ بظاہر تازہ اور خراب انڈوں میں فرق کرنا بعض اوقات مشکل ہوتا ہے، اس لیے انہیں استعمال کرنے سے پہلے ان کی حالت جانچنا ضروری ہے۔
ماہرین کے مطابق انڈوں کی تازگی جانچنے کے لیے چند آسان گھریلو طریقے اختیار کیے جا سکتے ہیں تاہم یہ بات ذہن میں رکھنا ضروری ہے کہ صرف ظاہری حالت سے انڈے کے محفوظ ہونے کی مکمل ضمانت نہیں دی جا سکتی۔
انڈوں کی تازگی جانچنے کے 7 آسان طریقے
پانی میں ڈال کر جانچیں
ایک برتن میں ٹھنڈا پانی بھر کر انڈا اس میں ڈال دیں اگر انڈا نیچے بیٹھ جائے تو عموماً تازہ جبکہ نیچے کھڑا ہونے والا انڈا نسبتاً پرانا ہو سکتا ہے۔ اگر انڈا پانی کی سطح پر تیرنے لگے تو وہ کافی پران ہونے کی نشانی ہے کوشش کریں ایسا انڈا استعمال نہ کریں۔
یہ بھی پڑھیں: انڈے سفید استعمال کیے جائیں یا براؤن؟ ماہرین نے بتا دیا
بدبو محسوس کریں
انڈا توڑنے کے بعد اگر اس سے تیز یا ناگوار بدبو آئے تو اسے استعمال نہ کریں۔ یہ انڈے کے خراب ہونے کی اہم علامت ہے۔
چھلکے کا معائنہ کریں
انڈے کے چھلکے پر دراڑیں، چپچپاہٹ یا پھپھوندی نظر آئے تو اسے استعمال کرنے سے گریز کریں۔ صاف اور سالم چھلکا بھی مکمل حفاظت کی ضمانت نہیں ہوتا۔
انڈے کو ہلا کر دیکھیں
انڈے کو آہستگی سے ہلانے پر اندر سے مائع کی آواز آنا اس کی عمر بڑھنے کی علامت ہو سکتی ہے۔ تاہم آواز نہ آنے کا مطلب یہ نہیں کہ انڈا لازماً تازہ یا محفوظ ہے۔
توڑنے کے بعد رنگ اور ساخت دیکھیں
تازہ انڈے کی زردی عموماً گول اور سفیدی نسبتاً گاڑھی ہوتی ہے۔ اگر انڈے کی سفیدی یا زردی کا رنگ غیرمعمولی ہو، یا اس سے بدبو آئے، تو اسے ضائع کر دیں۔
پیکنگ اور تاریخ چیک کریں
بازار سے انڈے خریدتے وقت ڈبے پر درج تاریخ اور دیگر معلومات ضرور دیکھیں۔ انڈوں کو گھر لانے کے بعد فریج میں رکھیں اور چھلکے پر دراڑ والے انڈے خریدنے سے گریز کریں۔
روشنی سے جانچ کریں
موبائل کی ٹارچ کی روشنی انڈے کے قریب رکھ کر اس کے اندرونی حصے کا جائزہ لیا جا سکتا ہے۔ اس طریقے کو کینڈلنگ کہا جاتا ہے، جس سے اندرونی ساخت اور بعض نقائص کا اندازہ لگایا جا سکتا ہے، تاہم یہ جراثیمی آلودگی یا کیمیائی مادوں کی موجودگی معلوم کرنے کا قابلِ اعتماد طریقہ نہیں۔
انڈوں میں اینٹی بائیوٹک کی موجودگی کا معاملہ
انڈوں کے معیار سے متعلق ایک اہم تشویش نائٹروفیوران جیسے ممنوعہ اینٹی بائیوٹک مادوں کی باقیات بھی ہیں۔ ایسے مادوں کی موجودگی کا تعین پانی، بو، چھلکے یا روشنی سے نہیں کیا جا سکتا، بلکہ اس کے لیے لیبارٹری ٹیسٹ درکار ہوتے ہیں۔ اس لیے کسی انڈے کو صرف گھریلو طریقوں سے جانچ کر کیمیائی آلودگی سے پاک قرار نہیں دیا جا سکتا۔
انڈوں کو محفوظ رکھنے کے لیے احتیاطی تدابیر
انڈے کو فریج میں مناسب درجۂ حرارت پر محفوظ کریں، ٹوٹے یا دراڑ والے چھلکوں کے انڈے ہر گز استعمال نہ کریں، انڈوں کو اچھی طرح پکانے کے بعد کھائیں انڈوں کو کچے یا نیم پکے گوشت اور دوسری غذاؤں سے الگ رکھیں غیرمعمولی رنگ یا بدبو والے انڈے ضائع کر دیں۔
