اسپین کے دارالحکومت میڈرڈ کے جنوب میں دو ٹرینوں کے خوفناک تصادم کے نتیجے میں کم از کم 30 افراد ہلاک ہوگئے جبکہ ہلاکتوں میں اضافے کا خدشہ ظاہر کیا جا رہا ہے۔

غیر ملکی میڈیا رپورٹس کے مطابق حادثے میں ایک رینفے ٹرین نے پٹری پر کھڑی ایریو ٹرین کو پیچھے سے ٹکر مار دی، جس کے باعث ایریو ٹرین کی دو بوگیاں پٹری سے اتر گئیں۔ حادثے کے وقت دونوں ٹرینوں میں 500 سے زائد مسافر سوار تھے۔

ہسپانوی حکام کے مطابق امدادی کارروائیاں جاری ہیں، جن میں فائر بریگیڈ کی متعدد ٹیمیں، تین ہیلی کاپٹر اور دو موبائل انتہائی نگہداشت یونٹس حصہ لے رہے ہیں۔

اسپین کے وزیراعظم پیڈرو سانچیز نے حادثے پر صدمے کا اظہار کرتے ہوئے کہا ہے کہ وہ وزیر ٹرانسپورٹ سے مسلسل رابطے میں ہیں۔ حادثے کے بعد میڈرڈ، سیوداد ریئل اور اندلس کے درمیان ٹرین سروس معطل کردی گئی ہے۔